Siradan Adam – Qaraqan

About Siradan Adam

Qaraqan “Sıradan Adam” mahnısının mənası Qaraqanın “Sıradan Adam” mahnısı fərqliliyin və azad düşüncənin cəmiyyətdə necə qəbul edildiyini əks etdirir. Mahnının vizual tərtibatı – kukla teatrı janrında çəkilmiş klip – bu ideyanı daha da gücləndirir. Əsas obraz olan “Sıradan Adam” cəmiyyətin qoyduğu qaydalara uyğun gəlmir, fərqli düşüncəyə sahib olduğu üçün tək qalır. Klipin əvvəlində onun kasıb və uğursuz həyatı göstərilir, lakin eyni zamanda mədəni və fərqli biri olduğu vurğulanır. Bunu divarda asılmış Nizami Gəncəvi şəklindən anlayırıq. Cəmiyyətin getdikcə eyniləşən, fərqsizləşən insanlardan ibarət olduğu ideyası plastik əməliyyatlarla hamının bir-birinə bənzədiyini göstərən qəzet vasitəsilə çatdırılır. “Sıradan Adam” bu sürüdən biri olmaq istəmir, amma eyni zamanda qəbul edilməmək qorxusu yaşayır. Klipin kulminasiya nöqtəsində o, əlində “2+2=5” yazısı ilə küçəyə çıxır, bu isə həqiqətlərin təhrif edildiyi bir dünyada insanların rahatlıq üçün yalanlara uyğunlaşdığını simvollaşdırır. O, nə qədər uyğunsuz görünsə də, yalanları qəbul etdikcə cəmiyyət onu özününkü kimi qarşılayır. Amma gerçək kimliyini qoruyanda, onu qəbul etmək istəmirlər, hətta ona hücum edirlər və sonda onu ruhi xəstə kimi xəstəxanaya aparırlar. Mahnının əsas mesajı budur: fərqli düşünən, azad ruhlu və mədəni insanlar cəmiyyətin bayağı kütləsi tərəfindən sıxışdırılır, qəbul edilmir, hətta dəliliklə günahlandırılır. Cəmiyyətin gözündə fərqli olmaq təhlükəlidir, çünki fərqlilik onların yaratdığı Matriksə uyğun gəlmir. Mədrəsədə iştirak edənlər bu mahnının həqiqi mesajını daha yaxşı anlayacaqlar. Hər birimizin daxilindəki İcma insanı və Şəxsiyyət arasındakı mübarizə burada özünü göstərir.